परिचय

प्रेस चौतारी नेपाल ताप्लेजुङ, प्रेस चौतारी नेपालको जिल्ला शाखा हो, जसले जिल्लामा सञ्चारकर्मीहरूको संगठनात्मक एकता, पेशागत हकहित, र उत्तरदायी पत्रकारिताको प्रवर्द्धनका लागि निरन्तर काम गरिरहेको छ । लोकतान्त्रिक मूल्य र प्रेस स्वतन्त्रताको संरक्षण गर्दै, प्रेस चौतारी ताप्लेजुङले सञ्चारमाध्यमको समृद्धिका साथै पत्रकारहरूको व्यावसायिक विकासमा पनि योगदान पुर्‍याउँदै आएको छ ।

ताप्लेजुङमा प्रेस चौतारीको औपचारिक यात्रा एल सी गुरुङको संयोजकत्वमा बनेको पहिलो तदर्थ समितिबाट सुरु भएको हो । त्यसपछि राजु यक्पाङ्देन पहिलो निर्वाचित अध्यक्ष बने, जसपछि कमल भट्टराईले लगातार दुई कार्यकाल नेतृत्व सम्हाल्नुभयो । हाल शाखाको अध्यक्ष वसन्त पालुङ्वा हुन्, जो हाल दोस्रो कार्यकालमा रहेका छन् ।

माघ २३, २०८१ मा सम्पन्न छैटौं जिल्ला अधिवेशनले उहाँको नेतृत्वमा १३ सदस्यीय कार्यसमिति चयन गरेको हो । हाल शाखामा ६५ जना क्रियाशील सदस्यहरू रहेका छन्, जसले जिल्लामा सञ्चालित विभिन्न रेडियो, पत्रिका, अनलाइन पोर्टल, टेलिभिजन तथा स्वतन्त्र पत्रकारितामा सक्रिय रूपमा काम गरिरहेका छन् ।

संस्थाले नियमित रूपमा पत्रकारिता तालिम, आचारसंहिता अभिमुखीकरण, मिडिया संवाद, र समाज परिवर्तनमूलक विषयमा अन्तक्र्रिया गर्दै आएको छ । प्रेस चौतारी ताप्लेजुङले पत्रकारहरूबीच सहकार्य, एकता, र पेशागत सुदृढीकरणमा बल दिँदै आएको छ । संस्थाले हरेक वर्ष माघ २२ गते, स्थापना दिवसका अवसरमा जिल्लामा क्रियाशील पत्रकारहरूलाई तीनवटा विशेष पुरस्कारद्वारा सम्मान गर्ने परम्परा कायम राखेको छ :

१. जयमति–कर्णबहादुर पत्रकारिता पुरस्कार – बलबहादुर तामाङद्वारा बुवाआमाको नाममा स्थापना गरिएको ।

२. भीमादेवी–अग्निप्रसाद पत्रकारिता पुरस्कार– इश्वरि पौडेलद्वारा बुवाआमाको नाममा स्थापित ।

३. प्रेस चौतारी नेपाल पत्रकारिता पुरस्कार – शाखाले स्थापना गरेको पुरस्कार ।

यी पुरस्कारहरू स्थानीय दाताहरूको सहयोगमा स्थापना गरिएका अक्षयकोषमार्फत प्रदान गरिन्छन्, जसले पत्रकारिताको योगदानलाई सम्मानित गर्दै नयाँ पुस्तालाई प्रेरणा दिने काम गरेको छ ।

प्रेस चौतारी ताप्लेजुङ पत्रकारिताको मात्र संस्था नभई, सामाजिक उत्तरदायित्व, सुशासन र अभिव्यक्ति स्वतन्त्रताको संवाहकका रूपमा पनि उभिएको छ । यसले ताप्लेजुङको पत्रकारिता क्षेत्रलाई नयाँ उचाइमा पुर्‍याउँदै जिल्लाभर प्रेस क्षेत्रको साझा पहिचान स्थापित गर्न सफल भएको छ ।